இந்தியாவின் எலெக்ட்ரிக் கார் சந்தை மிகவும் வேகமாக வளர்ந்து வருகிறது. தற்போதைய நிலையில் இந்தியாவின் எலெக்ட்ரிக் சந்தையில் டாடா மோட்டார்ஸ் நிறுவனம் சுமார் 80 சதவீத சந்தை பங்குடன் முன்னணியில் உள்ளது.
ஆனால் வரும் காலங்களில் இந்த நிலைமை மாறலாம். ஏனெனில் நிறைய நிறுவனங்கள் புதிய எலெக்ட்ரிக் கார்களை விற்பனைக்கு அறிமுகம் செய்வதற்கு திட்டமிட்டுள்ளன. குறிப்பாக சிட்ரோன் மற்றும் எம்ஜி போன்ற நிறுவனங்கள் மிகவும் குறைவான விலையில் புதிய எலெக்ட்ரிக் கார்களை அறிமுகம் செய்யும் பணிகளில் தற்போது ஈடுபட்டு வருகின்றன.
இந்திய சந்தையில் வெகு விரைவில் விற்பனைக்கு வரவுள்ள மிகவும் விலை குறைவான எலெக்ட்ரிக் கார்கள் குறித்த தகவல்களை தொகுத்து வழங்கியுள்ளோம்.
இதில் குறிப்பிடப்பட்டு இருக்கும் 3 எலெக்ட்ரிக் கார்களும் அடுத்த 6 மாதங்களுக்குள் இந்திய சந்தையில் விற்பனைக்கு வரும் என எதிர்பார்க்கப்படுகிறது. இதன் ஆரம்ப விலையும் 10 லட்ச ரூபாய் என்ற அளவில் இருப்பதற்கான வாய்ப்புகள் உள்ளன.
டாடா டியாகோ எலெக்ட்ரிக் கார் (Tata Tiago EV)
இந்திய சந்தையில் மிகவும் பிரபலமாக உள்ள ஹேட்ச்பேக் ரக கார்களில் ஒன்று டாடா டியாகோ. இதன் எலெக்ட்ரிக் வெர்ஷன்தான் இது. டியாகோ எலெக்ட்ரிக் கார் இந்திய சந்தையில் வெகு விரைவில் விற்பனைக்கு அறிமுகம் செய்யப்படும் என்பதை டாடா மோட்டார்ஸ் நிறுவனம் சமீபத்தில்தான் அதிகாரப்பூர்வமாக அறிவித்தது. இந்த ஆண்டு இறுதிக்குள்ளாகவே அல்லது அடுத்த ஆண்டின் தொடக்கத்திலோ டாடா டியாகோ எலெக்ட்ரிக் கார் விற்பனைக்கு வரும் என தகவல்கள் தெரிவிக்கின்றன. அதன்பின், இதுதான் டாடா மோட்டார்ஸ் நிறுவனத்தின் மிகவும் விலை குறைவான எலெக்ட்ரிக் காராக இருக்கும்.
டாடா மோட்டார்ஸ் நிறுவனம் தற்போது டிகோர் எலெக்ட்ரிக் கார் (Tata Tigor EV) மற்றும் நெக்ஸான் எலெக்ட்ரிக் கார்களை (Tata Nexon EV) விற்பனை செய்து வருகிறது. இதில், டிகோர் எலெக்ட்ரிக் காரில் 26kWh பேட்டரி தொகுப்பும், நெக்ஸான் எலெக்ட்ரிக் காரில் 30.2kWh பேட்டரி தொகுப்பும் பொருத்தப்பட்டுள்ளன.
இந்த 2 பேட்டரி ஆப்ஷன்களில் ஏதாவது ஒன்றுதான் டியாகோ எலெக்ட்ரிக் காரில் வழங்கப்படும் எனக் கூறப்படுகிறது. மிகவும் விலை குறைவான மாடல் என்பதால், அனேகமாக டாடா டிகோர் எலெக்ட்ரிக் காரின் 26kWh பேட்டரி தொகுப்புதான் டாடா டியாகோ எலெக்ட்ரிக் காரில் இடம்பெறும் என கணிக்கப்பட்டுள்ளது. எனவே டாடா டியாகோ எலெக்ட்ரிக் காரின் ரேஞ்ச் சுமார் 300 கிலோ மீட்டர்களாக இருக்கலாம். இது மிகவும் சிறப்பான ரேஞ்ச் என்பதாலும், விலை மிகவும் குறைவு என்பதாலும், டாடா டியாகோ எலெக்ட்ரிக் கார் இந்திய வாடிக்கையாளர்கள் மத்தியில் மிகப்பெரிய எதிர்பார்ப்புகளை ஏற்படுத்தியுள்ளது.
சிட்ரோன் சி3 எலெக்ட்ரிக் கார் (Citroen-C3 EV)
சிட்ரோன் சி3 கார் வெகு சமீபத்தில்தான் இந்திய சந்தையில் விற்பனைக்கு அறிமுகம் செய்யப்பட்டது. இந்த காரின் எலெக்ட்ரிக் வெர்ஷன்தான் இது. இந்தியா மற்றும் பிரேசில் போன்ற வளர்ந்து வரும் எலெக்ட்ரிக் கார் சந்தைகளுக்காக சி3 காரின் அடிப்படையிலான இந்த புத்தம் புதிய எலெக்ட்ரிக் காரை சிட்ரோன் நிறுவனம் தற்போது உருவாக்கி வருகிறது. சிட்ரோன் சி3 எலெக்ட்ரிக் கார் அனேகமாக வரும் டிசம்பர் மாதம் அறிமுகப்படுத்தப்படும் என எதிர்பார்க்கப்படுகிறது. அதை தொடர்ந்து அடுத்த ஆண்டின் முதல் காலாண்டில், விற்பனைக்கு வரலாம் என தகவல்கள் தெரிவிக்கின்றன.
சிட்ரோன் சி3 எலெக்ட்ரிக் காரில் பல்வேறு பேட்டரி ஆப்ஷன்கள் வழங்கப்படலாம் என எதிர்பார்க்கப்படுகிறது. இதில், 50kWh பேட்டரி ஆப்ஷன் ஒன்றாக இருக்கலாம். இந்த பேட்டரி ஆப்ஷனின் ரேஞ்ச் 362 கிலோ மீட்டர்கள் ஆகும். ஆனால் சிட்ரோன் சி3 எலெக்ட்ரிக் காரின் ஆரம்ப நிலை வேரியண்ட்களில் இதை காட்டிலும் சிறிய பேட்டரி ஆப்ஷன்தான் வழங்கப்படும் என கூறப்படுகிறது.
ஒரு முறை முழுமையாக நிரப்பினால் 300 கிலோ மீட்டர்கள் பயணிக்க கூடிய வகையில் இந்த பேட்டரி இருக்கும் என தகவல்கள் தெரிவிக்கின்றன. டாடா டியாகோ எலெக்ட்ரிக் காரை போலவே, சிட்ரோன் சி3 எலெக்ட்ரிக் காரும் இந்திய வாடிக்கையாளர்கள் மத்தியில் தற்போது மிகப்பெரிய எதிர்பார்ப்புகளை ஏற்படுத்தியுள்ளது.
எம்ஜி நிறுவனத்தின் சிறிய எலெக்ட்ரிக் கார் (MG Small EV)
அடுத்த ஆண்டு தொடக்கத்தில் இந்த சிறிய எலெக்ட்ரிக் கார் விற்பனைக்கு அறிமுகம் செய்யப்படும் என எதிர்பார்க்கப்படுகிறது. இந்தோனேஷியாவில் நடப்பாண்டு அறிமுகம் செய்யப்பட்ட வுல்லிங் ஏர் எலெக்ட்ரிக் காரின் (Wuling Air EV) அடிப்படையில் இந்த சிறிய எலெக்ட்ரிக் கார் உருவாக்கப்படும் என எதிர்பார்க்கப்படுகிறது.
ஆனால் இந்திய வாடிக்கையாளர்களின் தேவைகளை பூர்த்தி செய்யும் வகையில் மாற்றங்கள் செய்யப்படும். போக்குவரத்து நெரிசல் மிகுந்த நகர சாலைகளில் ஓட்டுவதற்கு ஏற்ற வகையில் இந்த புதிய எலெக்ட்ரிக் கார் உருவாக்கப்பட்டு வருவதாக தகவல்கள் தெரிவிக்கின்றன. இந்த சிறிய எலெக்ட்ரிக் காரில் 20kWh அல்லது 25kWh பேட்டரி தொகுப்பு வழங்கப்படுவதற்கான வாய்ப்புகள் உள்ளன. இந்த எலெக்ட்ரின் காரின் டிரைவிங் ரேஞ்ச் 200 முதல் 250 கிலோ மீட்டர்களாக இருக்கலாம் என கூறப்படுகிறது.
விலை குறைவான இந்த 3 புதிய எலெக்ட்ரிக் கார்களுக்கு வாடிக்கையாளர்கள் மத்தியில் பெரும் எதிர்பார்ப்புகள் உள்ளதால், இவை விற்பனையில் சாதிப்பதற்கான வாய்ப்புகள் அதிகம் உள்ளது.
