- முதன் முறையாக ரஜினியுடன் ஜெயிலர் படத்தில் இணைகிறார் தமன்னா.
- ரஜினியுடன் முதன் முறையாக நடிப்பதால் உற்சாகத்தில் இருக்கிறார் தமன்னா.
அண்ணாத்த படத்துக்கு பிறகு நெல்சன் திலீப் குமார் இயக்கத்தில் ரஜினிகாந்த் நடிக்க உள்ள புதிய படம் குறித்த அறிவிப்பை கடந்த பிப்ரவரி மாதமே வெளியிட்டனர். படத்துக்கு ஜெயிலர் என்று பெயர் வைத்து இருப்பதாகவும் சமீபத்தில் அறிவித்தனர். இது ரஜினிக்கு 169-வது படம். இந்த படத்தை சன் பிக்சர்ஸ் தயாரிக்கிறது. இப்படத்துக்கு அனிருத் இசையமைக்க இருக்கிறார். இப்படத்தின் முக்கிய கதாபாத்திரத்தில் பிரபல கன்னட நடிகர் சிவராஜ் குமார் நடிக்க இருக்கிறார். இப்படம் குறித்த அறிவிப்பு வெளியாகி சில மாதங்களான நிலையில் படப்பிடிப்பை படக்குழு தொடங்காமல் காலம் தாழ்த்தி வந்தது. படப்பிடிப்பை அடுத்த சில தினங்களில் தொடங்க ஏற்பாடுகள் நடக்கின்றன. அண்மையில் செய்தியாளர்களை சந்தித்த ரஜினிகாந்த் ஜெயிலர் படத்தின் படப்பிடிப்பு வரும் 15 அல்லது 22 ஆம் தேதிகளில் தொடங்கப்படும் என தெரிவித்திருந்தார். இதில் கதாநாயகியாக நடிக்க ஐஸ்வர்யாராயிடம் பேசி வந்தனர். ஆனால் அவர் வேறு படங்களில் நடிப்பதால் கால்ஷீட் இல்லை என்று கூறப்படுகிறது.
இதையடுத்து ரஜினி ஜோடியாக நடிக்க தமன்னாவை ஒப்பந்தம் செய்துள்ளனர். தமிழ், தெலுங்கில் முன்னணி கதாநாயகியாக இருக்கும் தமன்னா இந்தி படங்களிலும் நடித்து வருகிறார். பாகுபலியில் நடித்து பேசப்பட்டார். தற்போது 3 இந்தி படங்களும் 2 தெலுங்கு படங்களும் கைவசம் வைத்து நடிக்கிறார். ரம்யா கிருஷ்ணன் இன்னொரு நாயகியாக வருகிறார். ரஜினியுடன் நீலாம்பரி கதாபாத்திரத்தில் ரம்யாகிருஷ்ணன் நடித்து 1999-ல் வெளியான படையப்பா படம் பெரிய வரவேற்பை பெற்றது. ரஜினிக்கு வில்லனாக கன்னட நடிகர் சிவராஜ்குமார் நடிக்கிறார்.
தென்னிந்திய சினிமாவில் முன்னணி நடிகையாக தமன்னா உள்ளார். இந்தியில் அவர் நடித்த குலாபோ சிதாபோ, ஹிம்மத்வாலா உள்ளிட்ட படங்கள் வரவேற்பை பெற்றன. தமிழில் அஜித், விஜய் உள்ளிட்ட முன்னணி நடிகர்களுடன் இணைந்து நடித்துள்ளார் தமன்னா. 2005-ம் ஆண்டில் இருந்து தமன்னா திரைத்துறையில் இருந்து வருகிறார். இந்தியில் தற்போது பப்ளி பவுன்சர், போலே சுதியான், ப்ளான் ஏ ப்ளான் பி படங்களில் நடித்து வருகிறார்.தமிழில் கடைசியாக விஷால் நடித்திருந்த ஆக்சன் படத்தில் இடம்பெற்றிருந்தார் தமன்னா. சூப்பர் ஸ்டாருடன் இணைந்திருப்பதால் தமன்னாவின் மார்க்கெட் வேல்யூ அதிகரித்துள்ளது.
