வித்தியாசமான தோற்றம், ஐபோனுக்கு போட்டி என பலத்த அறிவிப்புகள் உடன் Nothing Phone (1) அறிமுகம் செய்யப்பட்டது. ஆரம்பத்தில் தயாரிப்பு அடிப்படையிலும், சாஃப்ட்வேர் (ஓஎஸ்) அடிப்படையிலும் சில குற்றச்சாட்டுகள் முன்வைக்கப்பட்டது. இதை சரிசெய்யும் வகையில் நிறுவனம் தொடர்ச்சியாக அப்டேட்டை வெளியிட்டு வருகிறது. நிறுவனம் முதல் போனிலேயே பெரும் பிழைகள் இருந்துவிடக் கூடாது என கவனமாக வேலை செய்து தொடர்ந்து புதுப்பிப்புகளை வழங்கி வருகிறது.
நத்திங் ஓஎஸ் பதிப்பு
அதன்படி நிறுவனம் கேமரா மேம்பாடுகள் உள்ளிட்ட சில மேம்படுத்தல்களை வழங்கி நத்திங் OS பதிப்பு 1.1.4 புதுப்பிப்பை வழங்கி உள்ளது. நத்திங் ஓஎஸ் பதிப்பு 1.1.4 புதுப்பிப்பு தற்போதே பயன்பாட்டுக்கு கிடைக்கிறது. ஜூலை மாதம் அறிமுகம் செய்யப்பட்டதில் இருந்த இந்த போன் பெறும் நான்காவது அப்டேட் இதுவாகும். செப்டம்பர் பாதுகாப்பு பேட்ச், கேமரா மேம்பாடுகள் என பல மேம்படுத்தல்களை வழங்குகிறது.
நத்திங் தீம் வாட்டர்மார்க்
நத்திங் ஓஎஸ் பதிப்பு 1.1.4 ஆனது கேமரா பயன்பாட்டில் நத்திங் தீம் வாட்டர்மார்க் சேர்க்கும் புதிய விருப்பத்தை கொண்டு வந்துள்ளது. அதேபோல் இந்த புதுப்பிப்பு அல்ட்ரா வைட் கேமரா வண்ண அளவுத்திருத்தத்தை மேம்படுத்தி வழங்குகிறது. பிரதான லென்ஸ் மற்றும் அல்ட்ரா வைட் சென்சார்களுக்குள் இருக்கும் வண்ண நிலைத் தன்மையை இந்த அப்டேட் சமப்படுத்துகிறது.
கேமரா மேம்பாடு
Moving objects அதாவது நகரும் பொருட்களை படமெடுக்கும் போது அதன் நிலைத்தன்மையை சரிசெய்ய New motion detection அல்காரிதம் வழங்கப்பட்டுள்ளது. அல்ட்ரா-வைட் பயன்முறையில் HDR ஐப் பயன்படுத்தும் போது காட்சியை பதிவும் செய்யும் வேகம் அதிகரிக்கப்பட்டுள்ளது. நைட் மோட் ஷாட்கள் வண்ணத் துல்லியமும் மேம்படுத்தி வழங்கப்பட்டுள்ளது.
முன்பக்கக் கேமராவில் இருக்கும் ஷார்ப்பர் அம்சமானது இயற்கையாகவே பிரகாசமான காட்சிகளை பதிவு செய்ய அனுமதிக்கிறது. நத்திங் ஓஎஸ் பதிப்பு 1.1.4 ஆனது ஃபேஸ் அன்லாக் அல்காரிதத்தை மேம்படுத்தி இருக்கிறது. செப்டம்பர் செக்யூரிட்டி பேட்ச், புது யுஐ சிஸ்டம் அப்டேட்ஸ், தெர்மல் செயல்திறன் மேம்படுத்தல் உள்ளிட்ட மேம்பாடுகளைக் கொண்டிருக்கிறது.
ஆண்ட்ராய்டு 13 அப்டேட்
அதேபோல் இந்த புதிய அப்டேட் மூலம் பயனர்கள் பேட்டரி ஆயுளை நீடிக்க முடியும் என நிறுவனம் தெரிவித்துள்ளது. இது தவிர நத்திங் மற்றொரு விஷயத்தையும் உறுதி செய்துள்ளது. அது ஆண்ட்ராய்டு 13 அப்டேட் குறித்த தகவல் ஆகும். 2023 இன் ஆரம்பத்தில் இந்த அப்டேட்டை பயனர்கள் பெறலாம் என அறிவித்துள்ளது. இந்த ஆண்டு இறுதிக்குள் பீட்டா பதிப்பில் இந்த அப்டேட் வழங்கி சோதனை செய்யப்படும் எனவும் தெரிவித்து இருக்கிறது.
தள்ளுபடியுடன் நத்திங் போன் (1)
சமீபத்தில் Nothing Phone (1) விலை ஆனது ஒவ்வொரு வேரியண்ட்-க்கும் ரூ.1000 என்ற வீதம் உயர்த்தப்பட்டது. இதனையடுத்து நத்திங் போன் (1) ரூ.33,999 என பிளிப்கார்ட்டில் விற்கப்பட்டு வந்த நிலையில், பிளிப்கார்ட் பிக் பில்லியன் டேஸ் விற்பனையில் இந்த ஸ்மார்ட்போன் ரூ.28,999 என்ற விலைக்கு கிடைக்கிறது. கூடுதலாக வங்கி சலுகைகளும் இருக்கிறது. இதன் மூலம் இன்னும் குறைவான விலைக்கு நத்திங் போனை வாங்க முடியும்.
