பிஎஸ்என்எல்-ல 4ஜி மட்டுமில்ல.. 5ஜி-யும் வரப்போகுது!

இந்திய அரசின் தொலைத்தொடர்பு நிறுவனமான பிஎஸ்என்எல் (BSNL), இந்தியாவில் தனது 4ஜி மற்றும் 5ஜி (BSNL 4G and 5G) சேவையை எப்போது தொடங்க இருக்கிறது என்பதற்கான உறுதியான தகவலை வெளியிட்டுள்ளது. இந்த ஆண்டு ஏப்ரலில் அரசு ஒப்புதல் அளித்ததைத் தொடர்ந்து, BSNL நிறுவனம் தனது 4ஜி நெட்வொர்க்கை நாட்டின் பல்வேறு பகுதிகளில் சோதனை செய்து வருகிறது. அதேபோல், BSNL 5ஜி இந்தியாவில் எப்போது அறிமுகம் செய்யப்படும் என்பதற்கான தேதியையும் வெளியிட்டுள்ளது.

எப்போது அறிமுகம்?

தனியார் டெலிகாம் ஆபரேட்டர்களால் 5G சேவைகள் வெளியிடப்படும் காலகட்டத்தில், BSNL நிறுவனம் தனது 4G சேவையை இந்தியாவில் அறிமுகம் செய்யவிருக்கிறது என்று தொலைத்தொடர்பு அமைச்சர் அஷ்வினி வைஷ்ணவ் உறுதிப்படுத்தியுள்ளார். இதன்படி, BSNL 4G ஜனவரி 2023 இல் வெளியிடப்படும் என்றும், சந்தாதாரர்களுக்கு 4ஜி விரைவில் கிடைக்கும் என்றும் வைஷ்ணவ் தெரிவித்தார்.

BSNL 5G.!

BSNL 5G அறிமுகம் பற்றிப் பேசுகையில், BSNL அதிரடியாகத் தனது 5ஜி சேவையையும் 2023 ஆம் ஆண்டிலேயே அறிமுகம் செய்ய திட்டமிட்டுள்ளதாக அவர் தெரிவித்திருக்கிறார். BSNL 5ஜி சேவையை இந்திய மக்கள் அடுத்த ஆண்டின் இரண்டாம் பாதியில் எதிர்பார்க்கலாம் என்றும் கூடிய அவர், BSNL 5ஜி அறிமுகம் செய்யப்படும் தேதியையும் வெளியிட்டு இருக்கிறார்.
முதலில் BSNL நிறுவனம் பொதுமக்களுக்கான 4ஜி சேவையை வரும் ஜனவரி 2023 முதல் இந்தியாவில் உள்ள சந்தாதாரர்களுக்குக் கிடைக்கச் செய்யும் என்று உறுதியளித்துள்ளது. தொலைத்தொடர்பு அமைச்சர் அஷ்வினி வைஷ்ணவ் மேலும் கூறுகையில், அடுத்த ஆகஸ்ட் 2023-க்குள், அரசாங்க ஆதரவில் இயங்கும் தொலைத்தொடர்பு நிறுவனமான BSNL பொதுமக்களுக்கு தேவையான 4ஜி மற்றும் 5ஜி சேவைகளை குறைந்த விலையில் வழங்கத் துவங்கும் என்றும் கூறியுள்ளார்.

ஆகஸ்ட் 15, 2023 ஆம் தேதி முதல் இந்தியாவில் BSNL 5ஜி சேவை கிடைக்கும் என்றும் அவர் உறுதிப்படத் தெரிவித்துள்ளார். நாட்டில் 4ஜி மற்றும் 5ஜி சேவைகளை வெளியிட பிஎஸ்என்எல் உள்நாட்டு தொழில்நுட்பங்களைப் பயன்படுத்தும் என்று வைஷ்ணவ் தெரிவித்திருக்கிறார். அதேபோல், BSNL நிறுவனம் அதன் 4ஜி மற்றும் 5ஜி சேவைகள் மூலம் இந்தியாவில் குறைந்தது 20 கோடி பயனர்களை, BSNL உடன் சேர்க்கும் என்றும் அவர் எதிர்பார்ப்பதாகக் கூறியிருக்கிறார்.

BSNL இந்தியாவில் 4ஜி சேவையை அறிமுகம் செய்ததும், பொதுமக்கள் நிச்சயமாக BSNL இன் குறைந்த விலை திட்டங்களால் ஈர்க்கப்பட்டு, பிரைவேட் நெட்வொர்களில் இருந்து அரசு நடத்தும் BSNL நெட்வொர்க்கிற்கு மாற அதிக வாய்ப்புகள் இருப்பதாக கணிக்கப்பட்டுள்ளது. குறிப்பாக, இந்தியாவின் மலை பகுதிகள் மற்றும் தொலைதூர கிராமங்களில் வாழும் மக்களுக்கு BSNL 4ஜி புதிய அனுபவத்தை வழங்கும் என்பதில் சந்தேகமில்லை.

4ஜி அறிமுகம் செய்யப்படும் அதே கையோடு, ஒரு சிறிய கால இடைவெளியில் BSNL 5ஜி வேகத்தையும் மக்களுக்கும் காண்பிக்கும் என்பதனால், டெலிகாம் துறையில் புதிய போட்டியை BSNL உருவாக்கும் என்று எதிர்பார்க்கப்படுகிறது. எது எப்படியாக இருந்தாலும், வருகின்ற 2023 ஆம் ஆண்டு BSNL பயனர்களுக்குச் சிறப்பான வருடமாக அமையப் போகிறது என்பதில் எந்த சந்தேகமுமில்லை. BSNL ரீசார்ஜ் திட்டங்களின் விலைகள் ஏற்கனவே மற்ற டெலிகாம் நிறுவனங்களை விட குறைவாக இருப்பதனால், 4ஜி திட்டங்களின் விலையும் குறைவாக இருக்கும் என்று எதிர்பார்க்கப்படுகிறது.