உங்க ஐபோன் ஒரிஜினலா? எப்படி கண்டுபிடிப்பது?

ரூ.12,000 க்கு வாங்கிய ஸ்மார்ட்போன்களில் போலியான ஆப்பிள் லோகோ ஸ்டிக்கர்களை (Fake Apple Logo Stickers) ஒட்டி, அதை லேட்டஸ்ட் ஐபோன் 13 என்று கூறி விற்பனை செய்து வந்த வட இந்திய கும்பலை போலீசார் கைது செய்து உள்ளனர்!

மேலோட்டமாகப் பார்த்தால், இந்த போலியான ஐபோனிற்கும் ஒரிஜினல் ஐபோனிற்கும் பெரிய அளவிலான வித்தியாசம் இருக்காது. அதே சமயம், இரண்டிற்கும் உள்ள வித்தியாசத்தை கண்டுபிடிப்பதொன்றும் பெரிய விஷயம் ஒன்றும் இல்லை! ஒரு புதிய ஐபோனை வாங்கியதுமே நீங்கள் செய்ய வேண்டிய முதல் வேலை அதன் IMEI நம்பரை சரிபார்ப்பதே ஆகும்.

IMEI நம்பர்

அனைத்து ஒரிஜினல் ஐபோன் மாடல்களிலும் IMEI நம்பர் இருக்கும் என்பதால் இதை வைத்தே உங்கள் கையில் இருக்கும் ஐபோன் ஒரிஜினலா அல்லது டூப்ளிகேட்டா என்பதை கண்டுபிடித்து விடலாம்! ஒரு ஐபோனின் ஐஎம்இஐ நம்பர் ஆனது ஐபோனின் பேக்கேஜிங் பாக்ஸ் உட்பட பல இடங்களில் இருக்கும். முதலில் ஐபோன் பேக் செய்யப்பட்டு வந்த பாக்ஸில் நிச்சயமாக பார்கோடில் சீரீஸ் நம்பர் மற்றும் IME I /MEID நம்பர் இருக்கும். அதையும் உங்கள் ஐபோனின் செட்டிங்ஸ் வழியாக கிடைக்கும் IMEI நம்பரும் ஒன்றாக இருக்கிறதா என்பதை சரிபார்க்க வேண்டும்!

செட்டிங்ஸ் வழியாக சரிபார்ப்பது எப்படி?

உங்கள் கையில் இருக்கும் ஐபோனின் IMEI நம்பரை கண்டறிய, செட்டிங்ஸ் > ஜெனரல் > அபௌட் (Settings > General > About) என்பதை கிளிக் செய்யவும். பின்னர் சீரீயல் நம்பரை தேடுங்கள். அதன் பிறகு, கீழ் நோக்கி ஸ்க்ரோல் செய்ய உங்கள் ஐபோனின் IMEI நம்பர் இருக்கும். அங்கே IMEI நம்பர் அல்லது சீரியல் நம்பர் இல்லை என்றால், அது ஒரு போலி ஐபோன் என்று அர்த்தம். ஒரு ஐபோனில் ஐஎம்இஐ நம்பர் இருந்தால் மட்டுமே போதாது, அது பழைய மாடலா அல்லது புதியதா என்பதையும் கண்டறிய வேண்டும். ஒவ்வொரு ஐபோனிற்கு உத்தரவாதம் இருக்கும். அது எப்போது காலாவதி ஆகும் என்கிற தேதியின் அடிப்படையில் உங்கள் ஐபோனின் “வயதை” உங்களால் கண்டுபிடிக்க முடியும். இதை கண்டுபிடிக்க ஆப்பிளின் “செக் கவரேஜ்” இணையதளத்தை (https://checkcoverage.apple.com/) பயன்படுத்தலாம்.

ஆப்பிள் ஸ்டோர்

அந்த வெப்சைட்டில் கொடுக்கப்பட்டுள்ள பாக்ஸில் உங்கள் ஐபோனின் சீரியல் நம்பரை டைப் செய்யவும். ஆப்பிள் நிறுவனம் அதன் தயாரிப்புகளுக்கு ஒரு வருட உற்பத்தியாளர் உத்தரவாதத்தை வழங்குவதால், உங்கள் ஐபோனுக்கான பக்கத்தில் காண்பிக்கப்படும் காலாவதி தேதியானது நீங்கள் அதை வாங்கிய தேதியுடன் பொருந்துகிறதா என்பதை கணக்கிடலாம்.
மேற்கண்ட எந்தவொரு செயல்முறையிலும் உங்களுக்கு நம்பிக்கை வரவில்லை என்றால், சந்தேகம் நீடிக்கிறது என்றால்.. உங்கள் ஐபோனை அருகிலுள்ள ஆப்பிள் ஸ்டோருக்கு எடுத்துச் செல்லவும். அங்கே உங்கள் ஐபோனின் நம்பகத்தன்மையை கண்டறிய ஆப்பிள் ஸ்டோர் நிர்வாகிகள் விரைவான சோதனையை நடத்தி, உங்கள் சந்தேகங்களை தீர்ப்பார்கள்!

அங்கீகரிக்கப்பட்ட டீலர்கள்

எப்போதுமே, அங்கீகரிக்கப்பட்ட ஆப்பிள் டீலரிடமிருந்து மட்டுமே ஐபோனை வாங்கவும். அமேசான், பிளிப்கார்ட், Imagine, Uni, Aptronix மற்றும் iWorld ஆகியவைகள் ஆப்பிளால் அங்கீகரிக்கப்பட்ட சில ஸ்டோர்கள் ஆகும். அதுமட்டுமின்றி க்ரோமா, விஜய் சேல்ஸ், ரிலையன்ஸ் ரீடெய்ல், சங்கீதா மொபைல்ஸ் போன்ற எலக்ட்ரானிக் ரீடெய்ல்ர்களிடம் இருந்து மட்டும் ஐபோன்களை வாங்குங்கள். விலை குறைவாக கிடைக்கிறது என்று தெரியாத நபர்களிடம் வாங்க வேண்டாம்.