ஹீரோ எலெக்ட்ரிக் (Hero Electric) நிறுவனம் கடந்த 2022ம் ஆண்டு, 1,00,123 எலெக்ட்ரிக் டூவீலர்களை விற்பனை செய்து சாதனை படைத்து இருக்கிறது. இதுதான் ஹீரோ எலெக்ட்ரிக் நிறுவனத்தின் மிகப்பெரிய வருடாந்திர விற்பனை எண்ணிக்கை என்பதும் இங்கே குறிப்பிடத்தக்கது. இந்தியாவில் தற்போது எலெக்ட்ரிக் டூவீலர்களுக்கு வாடிக்கையாளர்கள் மத்தியில் நல்ல வரவேற்பு கிடைக்க தொடங்கியுள்ளது. இதை பயன்படுத்தி கொண்டு, ஹீரோ எலெக்ட்ரிக் நிறுவனம் இமாலய சாதனையை படைத்துள்ளது.
7 எலெக்ட்ரிக் ஸ்கூட்டர்கள்
ஹீரோ எலெக்ட்ரிக் நிறுவனம் தற்போதைய நிலையில் 7 எலெக்ட்ரிக் ஸ்கூட்டர்களை விற்பனை செய்து வருகிறது. அவை போட்டான் எல்பி (Photon LP), ஆப்டிமா சிஎக்ஸ் (Optima CX), என்ஒய்எக்ஸ் ஹெச்எஸ்500 இஆர் (NYX HS500ER), என்ஒய்எக்ஸ் இ5 (NYX E5), அட்ரியா எல்எக்ஸ் (Atria LX) மற்றும் எடி (Eddy) ஆகும். இதில், ஆப்டிமா சிஎக்ஸ் எலெக்ட்ரிக் ஸ்கூட்டரானது, சிங்கிள் மற்றும் ட்யூயல் பேட்டரி ஆப்ஷன்களில் விற்பனைக்கு கிடைக்கிறது.
6 லட்சம் வாடிக்கையாளர்கள்
இந்தியாவில் தற்போதைய நிலையில் 6 லட்சம் வாடிக்கையாளர்கள் தங்களுக்கு இருப்பதாக ஹீரோ எலெக்ட்ரிக் நிறுவனம் தெரிவித்துள்ளது. ஹீரோ எலெக்ட்ரிக் நிறுவனம் கடந்த 2012ம் ஆண்டு, பஞ்சாப் மாநிலம் லூதியானா பகுதியில், தொழிற்சாலை ஒன்றை அமைத்தது. இங்கு 1 ஆண்டுக்கு 1 லட்சம் எலெக்ட்ரிக் டூவீலர்களை உற்பத்தி செய்ய முடியும். இதை தொடர்ந்து, மத்திய பிரதேச மாநிலம் பிதாம்பூர் பகுதியில் அமைந்துள்ள மஹிந்திரா குழுமத்தின் தொழிற்சாலையிலும், ஹீரோ எலெக்ட்ரிக் நிறுவனம் தனது எலெக்ட்ரிக் ஸ்கூட்டர்களை உற்பத்தி செய்ய தொடங்கியது. இந்த பணிகள் கடந்த 2022ம் ஆண்டு ஜூலை மாதம் தொடங்கப்பட்டன.
புதிய தொழிற்சாலை
ஆனால் ஹீரோ எலெக்ட்ரிக் நிறுவனத்தின் எலெக்ட்ரிக் ஸ்கூட்டர்களுக்கு தொடர்ந்து வாடிக்கையாளர்கள் மத்தியில் நல்ல வரவேற்பு கிடைத்து வருகிறது. எனவே ராஜஸ்தான் மாநிலத்தில் புதிய தொழிற்சாலை ஒன்றை கட்டமைக்கும் பணிகளை ஹீரோ எலெக்ட்ரிக் நிறுவனம் தற்போது மேற்கொண்டு வருகிறது. இந்த திட்டத்திற்கான புரிந்துணர்வு ஒப்பந்தம் ஏற்கனவே கையெழுத்தாகி விட்டது. ராஜஸ்தான் மாநில அரசு மற்றும் ஹீரோ எலெக்ட்ரிக் ஆகியவை இதில் கையெழுத்திட்டுள்ளன.
20 லட்சம் டூவீலர்கள்
ஹீரோ எலெக்ட்ரிக் நிறுவனத்தின் இந்த புதிய தொழிற்சாலையின் வருடாந்திர உற்பத்தி திறன் 2 மில்லியன் ஆகும். அதாவது இங்கு ஒரு வருடத்திற்கு 20 லட்சம் எலெக்ட்ரிக் டூவீலர்களை உற்பத்தி செய்ய முடியும். நடப்பு 2023ம் ஆண்டின் இறுதியில் இந்த தொழிற்சாலை பயன்பாட்டிற்கு வரும் என எதிர்பார்க்கப்படுகிறது. இங்கு வர்த்தக ரீதியிலான உற்பத்தி பணிகள் தொடங்கப்பட்ட பின், ஹீரோ எலெக்ட்ரிக் நிறுவனத்தின் விற்பனை எண்ணிக்கை மேலும் உயரும் என எதிர்பார்க்கப்படுகிறது.
டிவிஎஸ் ஐக்யூப்
இந்நிலையில் 2022 டிசம்பரில் 11,071 யூனிட்டுகள் டிவிஎஸ் ஐக்யூப் எலெக்ட்ரிக் ஸ்கூட்டர்கள் விற்பனையாகி உள்ளன. 2021 டிசம்பரைக் காட்டிலும் இது மிக அதிகம் ஆகும். வெறும் 1,212 யூனிட்டுகள் மட்டுமே அப்போது விற்பனையாகி இருந்தன. 2022 ஆம் ஆண்டில் டிவிஎஸ் ஸ்கூட்டருக்கான வரவேற்பு அதிகரித்திருப்பதை 2022 டிசம்பர் விற்பனை புள்ளி விபரங்கள் உறுதிப்படுத்துகின்றன. இந்த உயர்வு இந்தியாவில் டிவிஎஸ்-இன் ஐக்யூப் எலெக்ட்ரிக் ஸ்கூட்டருக்கு டிமாண்ட் பல மடங்கு அதிகரித்திருப்பதை உறுதிப்படுத்தும் விதமாக அமைந்துள்ளது.
மைலேஜ்
ஆரம்ப மற்றும் நடுநிலை வேரியண்டுகளில் (ஐக்யூப் எஸ் மற்றும் ஐக்யூப்) 3.04 kWh லித்தியம் அயன் பேட்டரி பேக் பயன்படுத்தப்பட்டு உள்ளது. இதன் ஃபுல் சார்ஜ் ரேஞ்ஜ் திறன் 100 கிமீ ஆகும். அதேவேளையில், 4.56 kWh லித்தியம் அயன் பேட்டரி பேக் ஓர் ஃபுல் சார்ஜில் 145 கிமீ ரேஞ்ஜை வழங்கும். இத்தகைய அதிக ரேஞ்ஜ் தரும் வேரியண்டிற்கான புக்கிங்கையே இன்னும் டிவிஎஸ் நாட்டில் தொடங்காமல் இருக்கின்றது.
புக்கிங்
இதற்கான புக்கிங்குகள் நாட்டில் தொடங்கும்பட்சத்தில் டிவிஎஸ் ஐக்யூப்-இன் விற்பனை இன்னும் பல மடங்கு அதிகரிக்கும் என எதிர்பார்க்கப்படுகின்றது. இந்த எலெக்ட்ரிக் ஸ்கூட்டரை தமிழகத்தின் முக்கிய நகர்பகுதிகளில் மட்டுமே நம்மால் வாங்க முடியும். சென்னை, கோயம்பத்தூர், மதுரை, தஞ்சாவூர், சேலம், திருச்சி, தூத்துக்குடி, நாகர்கோவில் மற்றும் விழுப்புரம் உள்ளிட்ட நகரங்களில் வசிக்கும் மக்களால் இந்த எலெக்ட்ரிக் ஸ்கூட்டரை புக் செய்து கொள்ள முடியும்
விலை
சென்னையில் ரூ. 1 லட்சத்து 14,936 என்கிற ஆன்-ரோடு விலையில் டிவிஎஸ் ஐக்யூப் எலெக்ட்ரிக் விற்பனைக்குக் கிடைக்கின்றது. இது ஆரம்ப நிலை வேரியண்டான ஐக்யூப்-இன் விலை ஆகும். இதன் ஐக்யூப் எஸ் வேரியண்டிற்கு ரூ. 1 லட்சத்து 21,057 விலை நிர்ணயம் செய்யப்பட்டுள்ளது. முன்னதாக கூறியதைப் போல் ஐக்யூப் எஸ்டி வேரியண்டின் விலை இப்போது வரை அறிவிக்கப்படவில்லை.
