நீங்க அவதாரம் எடுக்க வேண்டிய நேரம் வந்துருச்சு!

வாட்ஸ்அப் நிறுவனம் ‘அவதார்’களை (WhatsApp Avatar) உருவாக்கி ஷேர் செய்யும் புதிய அம்சத்தை அறிமுகம் செய்துள்ளது. இந்த அம்சம் இப்போது அனைவருக்கும் பயன்படுத்தக் கிடைப்பதனால், எப்படி உங்கள் வாட்ஸ்அப் கணக்கில் உங்களைப் போன்ற அவதாரை உருவாக்கலாம் என்று பார்க்கலாம்.

வாட்ஸ்அப் மெசேஜ்ஜிங் ஆப்- இல் (WhatsApp messaging app) இனி அவரவர் தங்களைப் போன்ற சொந்த அவதாரை உருவாக்கலாம் என்று கூறப்பட்டுள்ளது. அதேபோல், நிறுவனம் வழங்கும் 36 தனிப்பயன் ஸ்டிக்கர்களில் (WhatsApp sticker) உங்கள் அவதாரை பயன்படுத்தலாம்.

விருப்பம் போல டிசைன் செய்யலாம்.!

மெட்டா (Meta) நிறுவனம் இப்போது முதற்கட்டமாக இந்த அவதார்களை வாட்ஸ்அப் மேடையில் அறிமுகம் செய்துள்ளது. விரைவில் நிறுவனம் இன்னும் ஏராளமான ஸ்டைல் (WhatsApp Avatar Style) மேம்பாடுகளைச் சேர்ப்பதாக வாட்ஸ்அப் அதன் வலைப்பதிவு இடுகையில் உறுதிப்படுத்தியுள்ளது. இதில் லைட்டிங், ஷேடிங், ஹேர் ஸ்டைல், தோல் நிறத்தை மாற்றுவது, கண்கள், மூக்கு, காது, வாய் என்று ஒவ்வொன்றையும் உங்களை போல நீங்கள் உருவாக்கலாம்.

புது அப்டேட்டை பெற..

மெட்டா நிறுவனம் ஏற்கனவே இந்த புதிய அப்டேட்டை அனைத்து சாதனங்களுக்கும் வழங்கத் தொடங்கியுள்ளது. அதாவது வரும் நாட்களில் இந்த அம்சம் பொதுவாக எல்லா வாட்ஸ்அப் பயனர்களுக்கு கிடைக்கும் என்று நிறுவனம் கூறியுள்ளது. இந்த அவதார் அம்சத்தை நீங்களும் பயன்படுத்த விரும்பினால், உடனே உங்கள் வாட்ஸ்அப் ஆப்ஸை அப்டேட் (WhatsApp Update) செய்யுங்கள். கீழே வரும் முறைப்படி உங்களுக்கான அவதாரை உருவாக்குங்கள்.

மார்க் என்ன சொல்கிறார்?

“நாங்கள் வாட்ஸ்அப்பில் அவதாரங்களைக் (WhatsApp Avatar Feature) கொண்டு வருகிறோம்! இப்போது நீங்கள் வாட்ஸ்அப் சாட்களில் உங்கள் அவதாரத்தை ஸ்டிக்கராகப் பயன்படுத்தலாம். எங்கள் எல்லா பயன்பாடுகளிலும் விரைவில் கூடுதல் ஸ்டைல்கள் வரும்” என்று Meta இன் CEO மார்க் ஜுக்கர்பெர்க் Facebook இல் அறிவித்தார். மெட்டாவின் 3டி அவதாரங்கள் (3D avatar) ஸ்னாப்சாட்டின் பிட்மோஜி (Snapchat Bitmoji) மற்றும் ஆப்பிளின் மெமோஜி (Apple Memoji) போன்றவை என்பது குறிப்பிடத்தக்கது.

அவதார் உருவாக்குவது எப்படி ?

வாட்ஸ்அப் அவதாரத்தை உருவாக்க, “Settings” என்பதற்குச் சென்று “Avatar” என்பதைத் தேடவும். Avatar > Create Your Avatar என்பதைத் தட்டி, அதை உருவாக்குவதற்கான படிகளைப் பின்பற்றவும். தோல் தொனி (skin tone), சிகை அலங்காரம் (hairstyle), மூக்கு (nose) போன்ற பல்வேறு தனிப்பயனாக்குதல் விருப்பங்களிலிருந்து நீங்கள் தேர்வு செய்யலாம். இறுதியில் “Done” என்பதை கிளிக் செய்யவும்.

எவ்வாறு பயன்படுத்தலாம்?

உங்கள் அவதாரைச் சேமித்தவுடன், WhatsApp தானாகவே புதிய ஸ்டிக்கர் பேக்கை உருவாக்கும். அவதார்களை வாட்ஸ்அப்பில் ப்ரொபைல் படமாகப் (WhatsApp profile picture) பயன்படுத்தலாம் அல்லது ஸ்டிக்கர் பேக்கில் (WhatsApp sticker pack) இருந்து தேர்ந்தெடுத்து சாட் பட்டியலில் உள்ள தொடர்புகளுக்கு (WhatsApp contact) அனுப்பலாம். உங்கள் வாட்ஸ்அப் ஸ்டோரிஸ்-களிலும் (WhatsApp stories) அவதாரங்களை இடுகையிடலாம்

எப்படி ப்ரொபைல் பிக்ச்சராக மாற்றுவது?

“Settings” என்பதைத் தட்டி, உங்கள் ப்ரொபைல் பிக்ச்சர் புகைப்படத்தைத் தட்டவும். படத்தை மாற்ற திரையில் “பென்சில் (Pencil)” விருப்பத்தைக் காண்பீர்கள். உங்கள் டிஜிட்டல் அவதாரை ப்ரொபைல் படமாக வைக்க “Use Avatar” என்பதை கிளிக் செய்யவும்.

சாட்டில் அனுப்புவது எப்படி?

வாட்ஸ்அப் சாட்டை திறந்து “Stickers” விருப்பத்திற்குச் செல்லவும். ஐபோன்களில், ஸ்டிக்கர் விருப்பம், நீங்கள் செய்தியை உள்ளிடும் சாட் பாக்சில் இருக்கும். ஆண்ட்ராய்டு பயனர்கள் சாட் பாக்சில் உள்ள ஈமோஜி சின்னத்தைத் தட்டுவதன் மூலம் ஸ்டிக்கர்களை அணுகலாம். பின்னர் கீழே உள்ள “GIF” க்கு அடுத்துள்ள ஸ்டிக்கர் விருப்பத்தை கிளிக் செய்யவும்.

ஸ்டிக்கர் ஆக்குவது எப்படி?

நீங்கள் ஏற்கனவே அவதாரை உருவாக்கியிருந்தால், நீங்கள் ஒரு பேக்கைக் காண்பீர்கள். நீங்கள் அனுப்ப விரும்பும் அவதாரத்தைத் தேர்ந்தெடுத்து Send என்பதைத் தட்டவும். நீங்கள் அவதாரை உருவாக்கவில்லை எனில், புதிய பக்கம் ஒன்று தோன்றும், அதில் ஒன்றை உருவாக்கும்படி கேட்கும். ‘Get Started’ என்பதைத் தட்டி, உங்கள் அவதாரத்தை உருவாக்கலாம்.