நோக்கியா ஒரே நேரத்தில் தனது 5 ஸ்மார்ட்போன்களுக்கு ஆண்ட்ராய்டு 13 அப்டேட்டை வழங்க இருக்கிறது. நோக்கியாவின் இந்த அறிவிப்பு கேட்டு சீன ஸ்மார்ட்போன் நிறுவனங்கள் மட்டுமின்றி, இந்திய மொபைல் பிராண்டுகள் கூட கொஞ்சம் அதிர்ச்சி ஆகி இருக்கலாம்!
நோக்கியாவிற்கென ஒரு தனி ரசிகர் கூட்டமே உள்ளது. இருந்தாலும் கூட சீன ஸ்மார்ட்போன்களின் ஆதிக்கத்தால் நோக்கியா ஸ்மார்ட்போன்கள் ஆனது இருக்கும் இடம் தெரியாமல் உள்ளன! இன்னும் சொல்லப்போனால் நோக்கியாவில் ஸ்மார்ட்போன்கள் வருகிறதா என்று கேட்கும் அளவிற்குத் தான் அதன் நிலை இருக்கிறது. அந்த நிலை மாற வேண்டும் என்றால், நோக்கியா என்கிற பிராண்டுக்கு மக்களின் அன்பு மட்டும் போதாது; அவர்களின் நம்பிக்கையும் வேண்டும்! அதாவது நோக்கியா ஸ்மார்ட்போன்கள் மீது பணம் செலவழிக்க மக்கள் தயாராக இருக்க வேண்டும்! அப்படியான நம்பிக்கையை (மீண்டும்) பெறும் நோக்கத்தின் கீழ், நோக்கியா இந்த புதிய அறிவிப்பை வெளியிட்டுள்ளது. இந்த அறிவிப்பை நோக்கியாவின் உண்மையான கம்பேக் (Comeback) என்றே கூறலாம்!
5 ஸ்மார்ட்போன்கள்!
நோக்கியா நிறுவனம் அதன் 5 ஸ்மார்ட்போன்களின் பட்டியலை வெளியிட்டு, அவைகள் அனைத்துமே ஆண்ட்ராய்டு 13 ஓஎஸ் அப்டேட்டை (Android 13 OS Update) பெறும் என்று அறிவித்துள்ளது. நோக்கியாவின் இந்த அறிவிப்பானது, லேட்டஸ்ட் ஓஎஸ் அப்டேட்டின் அம்சங்களை அனுபவிக்க விரும்பும் நோக்கியா ரசிகர்களுக்கான ஒரு குட் நியூஸ் ஆகும். கூடவே சீன நிறுவனங்களுக்கான ஒரு பேட் நியூஸும் ஆகும்!
நோக்கியாவின் இந்த அறிவிப்பு, நோக்கியா பிராண்டட் ஸ்மார்ட்போன்களின் மீதான மதிப்பை அதிகரிக்கும். ஏனென்றால் ஆண்ட்ராய்டு 13 ஓஎஸ் அடிப்படையிலான கஸ்டம் ஸ்கின்களை வழங்கும் சீன ஸ்மார்ட்போன்களுடன் ஒப்பிடும் போது நோக்கியா வழங்கும் ஆண்ட்ராய்டு 13 ஓஎஸ் அப்டேட் ஆனது, தன் பயனர்களுக்கு நியர்-ஸ்டாக் எக்ஸ்பீரியன்ஸை (Near stock experience) வழங்கும். இதன் விளைவாக, நோக்கியா குறிப்பிட்டுள்ள 5 ஸ்மார்ட்போன்களின் விற்பனை தானாக அதிகரிக்கும்!
ஆண்ட்ராய்டு 13 அப்டேட்டிற்கு தகுதியான 5 நோக்கியா போன்களின் பட்டியல் இதோ:
01. நோக்கியா எக்ஸ்ஆர்20 (NOKIA XR20)
02. நோக்கியா எக்ஸ்20 (NOKIA X20)
03. நோக்கியா எக்ஸ்10 (NOKIA X10)
04. நோக்கியா ஜி50 (NOKIA G50)
05. நோக்கியா ஜி11 பிளஸ் (NOKIA G11 Plus)
மேலும் 3 போன்கள்!
நோக்கியா நிறுவனத்தால் பட்டியலிடப்பட்ட 5 ஸ்மார்ட்போன்களை தவிர்த்து, நோக்கியா சி31 (NOKIA C31), நோக்கியா ஜி60 5ஜி (NOKIA G60 5G) மற்றும் நோக்கியா எக்ஸ்30 5ஜி (NOKIA X30 5G) ஆகிய ஸ்மார்ட்போன்களும் கூட ஆண்ட்ராய்டு 13 ஓஎஸ் அப்டேட்டை பெறும் என்று எதிர்பார்க்கப்படுகிறது. மேற்கண்ட 3 ஸ்மார்ட்போன்களும் நோக்கியா மொபைல் வெளியிட்ட பட்டியலில் இடம்பெறாமல் போனதற்கு காரணம் – அவைகள் இன்னும் சீன சந்தையில் அறிமுகம் செய்யப்படவில்லை. அதாவது, பட்டியலில் நாம் பார்த்த நோக்கியா ஸ்மார்ட்போன்கள் ஆனது சீனாவில் மட்டுமே ஓஎஸ் அப்டேட்டை பெறவுள்ளன. அதே அப்டேட், இந்தியாவிற்கு எப்போது வரும் என்கிற தகவல்கள் இன்னும் வெளியிடப்படவில்லை.