ஓலா நிறுவனம் இந்திய சந்தையில் S1 மற்றும் S1 Pro என இரு எலெக்ட்ரிக் ஸ்கூட்டர் மாடல்களை விற்பனை செய்து வருகிறது. சமீபத்தில் ஓலா நிறுவனம் தனது ஸ்கூட்டருக்கு மூவ் ஓ.எஸ். 2 அப்டேட் வழங்கியது.
இதனையடுத்து ஓலா S1 ப்ரோ எலெக்ட்ரிக் ஸ்கூட்டரை முழுமையாக சார்ஜ் செய்தால் 300-க்கும் அதிக கி.மீ. ரேன்ஜ் வழங்குவதாக தகவல் வெளியாகி உள்ளது.
சமீபத்தில் வெளியிடப்பட்ட மூவ் ஓ.எஸ். 2 (move os 2.0) அப்டேட்டிற்கு பின் புதிய இகோ மோட் (eco mode) பயன்படுத்தியதில் இது நிகழ்ந்து இருக்கிறது. ஓலா ஸ்கூட்டர் பயனரான சத்யேந்திர யாதவ் தனது ஓலா S1 ப்ரோ எலெக்ட்ரிக் ஸ்கூட்டரில் ஐந்து சதவீதம் சார்ஜ் மீதம் இருக்கும் நிலையில், 300 கி.மீ. வரை பயணம் செய்து இருக்கிறார். இவரது ஸ்கூட்டரின் டேஷ்போர்டு விவரங்களின் படி ஸ்கூட்டரை மணிக்கு 20 கி.மீ. எனும் சராசரி வேகத்தில் இயக்கிய போது 300 கி.மீ. ரேன்ஜ் கிடைத்து இருக்கிறது. இந்த பயணத்தின் போது அதிகபட்சம் வேகம் மணிக்கு 38 கி.மீ ஆக இருந்துள்ளது.
மற்றொரு ஓலா ஸ்கூட்டர் பயனர் தனது ஸ்கூட்டரில் நான்கு சதவீதம் சார்ஜ் மீதம் இருந்த நிலையில் 303 கி.மீ. வரை பயணம் செய்து அசத்தி இருக்கிறார். இவரின் டேஷ்போர்டு விவரங்களின் படி ஸ்கூட்டரை மணிக்கு 23 கி.மீ. எனும் சராசரி வேகத்தில் இயக்கி இருக்கிறார். அதிகபட்சமாக இவரின் ஸ்கூட்டர் மணிக்கு 40 கி.மீ. வேகத்தில் சென்றுள்ளது. சில மாதங்களுக்கு முன்பு ஓலா எலெக்ட்ரிக் சி.இ.ஒ. பாவிஷ் அகர்வால், ஓலா எலெக்ட்ரிக் ஸ்கூட்டர்களை கொண்டு 200 கி.மீ. ரேன்ஜ் எட்டிய வாடிக்கையாளர்களுக்கு லிமிடெட் எடிஷன் குயெரா ஓலா S1 ப்ரோ எலெக்ட்ரிக் ஸ்கூட்டர்களை பரிசாக வழங்கினார். அதேபோல் இப்போத்ம் புதிதாக 300 கி.மீ. ரேன்ஜ் எட்டியவர்களுக்கு பரிசு வழங்கப்படுமா என்ற கேள்வி நெட்டிசன்களிடையே பேசு பொருளாக உள்ளது.