Vivo சமீபத்தில் சீனாவில் S16 சீரிஸை அறிமுகப்படுத்தியது. விவோ தனது S16 வரிசையில் S16e , S16 5G மற்றும் S16 Pro என மூன்று ஸ்மார்ட்போன்களை அறிமுகப்படுத்தியது. இதில், S16 மற்றும் S16 Pro மொபைல்களின் வடிவமைப்பு மற்றும் ஹார்டுவேரில் சில மாற்றங்கள் செய்யப்பட்டு Vivo V27 சீரிஸின் கீழ் இந்தியாவிற்கு வந்தது. இப்போது, விவோ அந்த S16 சீரிஸின் வாரிசு மாடல்களை தயாரித்து வருவது போல் தெரிகிறது. இது Vivo S17 சீரிஸ் என அறிமுகமாக இருக்கிறது. இதுபற்றிய புதிய கசிவு இந்த S17 தொடரின் முக்கிய விவரக்குறிப்புகளை வெளிப்படுத்தியுள்ளது. ‘டெக் அவுட்லுக் ரிப்போர்ட்’ நிறுவனம் விவோ இந்த சீரிஸில் மூன்று ஸ்மார்ட்போன்களை வரிசையாக அறிமுகப்படுத்தும் என்று கூறியுள்ளது.
அதாவது Vivo புதிய S-சீரிஸ் வரிசையின் ஒரு பகுதியாக S17, S17e மற்றும் S17 Pro மாடல் போன்களை அறிமுகப்படுத்தும் என்று கூறப்படுகிறது. Vivo S17 சீரிஸின் விவரக்குறிப்புகள், அம்சங்கள் மற்றும் இதுவரை அறியப்பட்ட பிற விவரங்களைப் பார்ப்போம்.
Vivo S17 சீரிஸ் வெளியீடு
Vivo S17 சீரிஸில் மூன்று மிட்-ரேஞ்ச் மற்றும் பிரீமியம் ஸ்மார்ட்போன்கள் இடம்பெறும். இந்த போன்கள் விரைவில் சீனாவில் அறிமுகப்படுத்தப்படும் என்று எதிர்பார்க்கப்படுகிறது. தி டெக் அவுட்லுக்கின் அறிக்கையின்படி, S17, S17 Pro மற்றும் S17e ஆகியவை முறையே V2283A, V2284A மற்றும் V2285A மாதிரி எண்களைக் கொண்டுள்ளன.
இந்த வரிசையில் உள்ள சில மாடல்கள் சீனாவிற்கு வெளியே Vivo V29 சீரிஸ் வடிவில் அறிமுகப்படுத்தப்படலாம் என்று அறிக்கை கூறுகிறது. இது போன்களின் சில முக்கிய விவரக்குறிப்புகள் மற்றும் அம்சங்களை வெளிப்படுத்தியது.
டிஸ்ப்ளே
S17 சீரிஸ் போன்களில் சூப்பர் AMOLED டிஸ்ப்ளே இடம்பெறும் என்று கூறப்படுகிறது. மூன்று மாடல்களும் வளைந்த விளிம்புடன் கூடிய திரையைக் கொண்டிருக்கும் என்று கூறப்படுகிறது. இது தவிர, வண்ணத்தை மாற்றும் பின்புற பேனல் வேரியண்டும் இருக்கும்.
மெமரி
S17 சீரிஸ் போன்களின் ரேம் மற்றும் சேமிப்பகத்தைப் பொறுத்தவரை, அடிப்படை மாடலில் 8 ஜிபி ரேம் மற்றும் 128 ஜிபி சேமிப்பு இருக்கும். சில வேரியண்டில் 8 ஜிபி + 256 ஜிபி சேமிப்பக விருப்பத்தைப் பெறலாம். அதேசமயம் சில டாப்-எண்ட் வேரியண்டில் 12 ஜிபி ரேம் மற்றும் 256 ஜிபி சேமிப்புத்திறன் இருக்கவும் வாய்ப்புள்ளது. S17 Pro ஆனது 16GB RAM உடன் வரும். அதுபோல் இந்த சீரிஸ் போன்களில் நீட்டிக்கப்பட்ட ரேமுக்கான ஆதரவும் இருக்கும்.
கேமரா
இந்த சீரிஸ் மொபைல்களின் பிரதான கேமராவிற்கு ஆப்டிகல் இமேஜ் ஸ்டெபிலைசேஷன் (OIS) வசதி இருக்கும் என்று எதிர்பார்க்கப்படுகிறது. தற்போது, கேமரா வன்பொருள், சென்சார்களின் எண்ணிக்கை உள்ளிட்ட விவரங்கள் வெளியாக வில்லை.
அறிமுகம்
Vivo தனது S17 சீரிஸை 2023 ஆம் ஆண்டின் மூன்றாம் காலாண்டில் அறிமுகப்படுத்தும் என்று கூறப்படுகிறது. இதன் பொருள் சீனாவில் ஜூலை மற்றும் செப்டம்பர் 2023 க்கு இடையில் இந்த மொபைல்கள் அறிமுகமாகும். S17 தொடரின் சீன வெளியீட்டிற்கு இன்னும் சில மாதங்கள் உள்ளன. எனவே, V29 சீரிஸ் வடிவில் இந்த போன்களை இந்தியாவில் வெளியிடவும் சிறிது காலம் எடுக்கும். S17 தொடரின் அறிமுகம் குறித்த எந்த விவரத்தையும் Vivo அதிகாரப்பூர்வமாக உறுதிப்படுத்தவில்லை.