హైలైట్స్:
- సెప్టెంబర్ 7 న జరగనున్న ఆపిల్ ఈవెంట్
- ఈవెంట్ లో లాంచ్ కానున్న ఐఫోన్ 14 సిరీస్, వాచ్ సిరీస్ 8, ఐప్యాడ్ మోడల్స్
- ఎయిర్పాడ్స్ ప్రో, మ్యాక్ ప్రో కూడా లాంచ్ అయ్యే అవకాశం
సెప్టెంబర్ 7 న ఆపిల్ ఈవెంట్ 2022 జరగనుంది. ఈ సందర్భంగా పలు ఉత్పత్తులను ఆపిల్ లాంచ్ చేయనుంది. ఐఫోన్ 14 సిరీస్, వాచ్ సిరీస్ 8 తదితర ప్రోడక్ట్స్ ఈవెంట్ లో లాంచ్ అయ్యే అవకాశముంది. ఇటీవలె ఆపిల్ నుంచి వచ్చిన ఇమేజ్ టీజర్ ని బట్టి కంపెనీ ఆస్ట్రోఫోటోగ్రఫీ, శాటిలైట్ నెట్వర్క్ కనెక్టివిటీ, ఆల్వేస్-ఆన్-డిస్ప్లే తదితర వాటిపై దృష్టి పెట్టినట్లు తెలుస్తోంది. ఈసారి ఐఫోన్ 14 సిరీస్ లో నాచ్ కి సంబంధించిన మార్పులను గమనించవచ్చు. ఏళ్ళుగా కొనసాగుతోన్న డిజైన్ కి యాపిల్ ఎండ్ కార్డ్ వేయనుందని అర్థమవుతోంది.
ప్రపంచ వ్యాప్తంగా ఉన్న ఆపిల్ ఫ్యాన్స్, టెక్నాలజీ ప్రియులు, ప్రతి ఏడాది జరిగే ఆపిల్ ఈవెంట్ కోసం ఎంతగానో ఎదురు చూస్తుంటారు. సెప్టెంబర్ 7 న జరగబోవు ఆపిల్ ఈవెంట్ లో ఏయే ప్రోడక్ట్స్ లాంచ్ కానున్నాయో ఈ ఆర్టికల్ లో మేం వివరిస్తాం.
సెప్టెంబర్ 7 న జరగనున్న Apple ఈవెంట్: ఏం ఆశించవచ్చు?
iPhone 14 series: గతేడాది విడుదలైన ఐఫోన్ 13 లైనప్ కి సక్సెసర్ గా ఐఫోన్ 14 సిరీస్ రానుంది. సెప్టెంబర్ 7 న జరగబోవు ఈవెంట్ లో ఆపిల్ ఐఫోన్ 14 సిరీస్ ని లాంచ్ చేసేందుకు అవకాశాలు చాలా ఎక్కువగా ఉన్నాయి. అయితే ఈసారి కేవలం మూడు మోడల్స్ మాత్రమే రానున్నట్లు తెలుస్తోంది. మినీ వర్షన్ ని ఈసారి తీసుకు రావడం లేదని సమాచారం. అలాగే 6.7 అంగుళాల స్క్రీన్ కలిగిన ఐఫోన్ 14 మ్యాక్స్ మోడల్ ని ఆపిల్ తీసుకొచ్చే అవకాశమున్నట్లు తెలుస్తోంది. అయితే ఇది వంద శాతం నిజమని చెప్పలేం. ఇక ఈ లైనప్ లో స్టాండర్డ్ వేరియంట్ అయిన ఐఫోన్ 14, ఐఫోన్ 14 ప్లస్ లేదా మ్యాక్స్, ఐఫోన్ 14 ప్రో, ఐఫోన్ 14 ప్రో మ్యాక్స్ మోడల్స్ ఉండనున్నాయి.
సంప్రదాయ నాచ్ డిజైన్ కి బదులుగా ఐఫోన్ 14 ప్రో మోడల్స్ లో పిల్-షేప్డ్ హోల్-పంచ్ కటౌట్ ఉండనున్నట్లు సమాచారం. అయితే స్టాండర్డ్ మోడల్ మాత్రం పాత నాచ్ డిజైన్ తోనే వస్తున్నట్లు తెలుస్తోంది. ఐఫోన్ 14 సిరీస్ మోడల్స్ స్క్వేర్ ఎడ్జెస్ తో కూడిన బాక్సీ డిజైన్ ని కలిగి ఉంటాయని అంచనా. ఐఫోన్ 14 మరియు ఐఫోన్ 14 ప్రో మోడల్స్ వరుసగా 6.1 మరియు 6.7 అంగుళాల డిస్ప్లే సైజులను కలిగి 120 హెర్ట్జ్ రిఫ్రెష్ రేట్ కి సపోర్ట్ చేస్తాయని అంచనా. ఇక ప్రో వర్షన్స్ విషయానికి వస్తే, ఇవి ఆల్వేస్-ఆన్-డిస్ప్లే ఫంక్షనాలిటీని కలిగి ఉంటాయని సమాచారం.
ఐఫోన్ 14 ప్రో మోడల్స్ లో ఆపిల్ ఏ16 బయోనిక్ చిప్సెట్ ఉండనుంద. స్టాండర్డ్ వర్షన్స్ లో ఏ15 బయోనిక్ చిప్ ఉంటుందని అంచనా. ఐఫోన్ 14 లో 3279 ఎంఏహెచ్ బ్యాటరీ, ఐఫోన్ 14 మ్యాక్స్ లో 4325ఎంఏహెచ్ బ్యాటరీ, ఐఫోన్ ప్రో లో 3200ఎంఏహెచ్ బ్యాటరీ, ఐఫోన్ 14 ప్రో మ్యాక్స్ లో 4323 ఎంఏహెచ్ బ్యాటరీ ఉంటాయని తెలుస్తోంది. ఇక కెమెరాల గురించి తెలుసుకుందాం. ఐఫోన్ 14 సిరీస్ మెరుగైన కెమెరా సెన్సర్స్ తో వస్తున్నట్లు సమాచారం. ప్రైమరీ సెన్సర్ 48 ఎంపి ఉంటుందని అంచనా.
Apple Watch Series 8: సెప్టెంబర్ 7 న జరగబోవు ఈవెంట్ లో వాచ్ సిరీస్ 8 కూడా లాంచ్ కానున్నట్లు సమాచారం. వాచ్ ఎస్ఈ సక్సెసర్ ని బడ్జెట్ సెగ్మెంట్ లో పెట్టే అవకాశముంది. వాచ్ సిరీస్ 3 కూడా రెగ్యులర్ మోడల్స్ మాదిరి పెర్ఫామెన్స్ ను అందించనున్నాయి.
ఇక ఇవే కాకుండా, ఆపిల్ ఒక రగ్డ్ స్మార్ట్ వాచ్ (యాపిల్ వాచ్ ప్రో) ని తీసుకు రానున్నట్లు సమాచారం. ఇది కచ్చితంగా స్పోర్ట్స్, ఫిట్నెస్ ఔత్సాహికుల కోసమని తెలుస్తోంది. ఈ వాచ్ అత్యంత దృఢమైన టైటానియం కేసింగ్, భారీ డ్యామేజ్-రెసిస్టంట్ స్క్రీన్ కలిగి ఉండనుంది. అలాగే ఈ వాచ్ ధర కూడా చాలా ఎక్కువగా ఉంటుందని అంచనా.
కొత్త ఐప్యాడ్: కొత్త ఐప్యాడ్ మోడల్స్ ని కూడా ఈవెంట్ లో పరిచయం చేయనున్నట్లు సమాచారం. అలాగే ఇందులో బడ్జెట్ ఐప్యాడ్ కూడా ఉండనుందట. ఐప్యాడ్ మినీ, ఐప్యాడ్ ప్రో, బడ్జెట్ ఐప్యాడ్ అని మూడు వేరియంట్స్ ఈ లైనప్ లో ఉంటాయని సమాచారం. ఎంట్రీ లెవెల్ వర్షన్ లో ఏ14 చిప్సెట్ ఉండే అవకాశం ఉంది. మిగతా వేరియంట్స్ లో ఎమ్2 చిప్సెట్ ఉండనున్నట్లు తెలుస్తోంది.
