Vivo V40e స్మార్ట్ఫోన్ వివో వీ40 సిరీస్ లో వచ్చిన మూడో డివైజ్. ఈ ఫోన్ గత మోడల్ వివో వీ30ఈ కి సక్సెసర్ గా మార్కెట్ లోకి వచ్చింది. దీని ప్రారంభ ధర భారత్లో రూ.28,999 గా ఉంది. ఇదే సెగ్మెంట్లో వచ్చిన Nothing Phone (2a) Plus స్మార్ట్ఫోన్, వివో వీ40ఈ కి గట్టి పోటీదారు అని చెప్పవచ్చు. మీరు గనుక, ఈ రెండు ఫోన్లలో దేన్ని ఎంచుకోవాలనే సందిగ్ధంలో ఉంటే, ఈ ఆర్టికల్ మీ కొరకే. ఈ రెండు ఫోన్లను పోల్చి చూసి, ఏది బెటర్ ఆప్షన్ అనే విషయాన్ని తెలుసుకుందాం పదండి.
Vivo V40e vs Nothing Phone (2a) Plus: ధరలు
| వివో వీ40ఈ | నథింగ్ ఫోన్ 2ఏ ప్లస్ |
| 8జిబి+128జిబి: రూ.28,999 | 8జిబి+256జిబి: రూ.27,999 |
| 8జిబి+256జిబి: రూ.30,999 | 12జిబి+256జిబి: రూ.29,999 |
రెండు ఫోన్ల ధరలను గమనిస్తే, నథింగ్ ఫోన్ 2ఏ ప్లస్, వివో వీ40ఈ కంటే తక్కువ ధర కలిగి ఉండటంతో పాటు, బేస్ వేరియంట్లో ఎక్కువ స్టోరేజీని అందిస్తోంది. అంతేకాదు, నథింగ్ ఫోన్ 2ఏ ప్లస్ యొక్క హయ్యర్ వేరియంట్ కూడా వివో వీ40ఈ కంటే తక్కువ ధరలో లభిస్తుండటమే గాక, ఎక్కువ ర్యామ్ ని కూడా ఆఫర్ చేస్తోంది. మరోవైపు, వివో వీ40ఈ యొక్క టాప్ మోడల్ 8జిబి ర్యామ్ని మాత్రమే అందిస్తోంది.
Vivo V40e vs Nothing Phone (2a) Plus: డిజైన్
| స్పెసిఫికేషన్స్ | వివో వీ40ఈ | నథింగ్ ఫోన్ 2ఏ ప్లస్ |
| కలర్ | రాయల్ బ్రాంజ్, మింట్ గ్రీన్ | గ్రే, బ్లాక్ |
| చుట్టుకొలత | 163.7 x 75 x 7.5 | 161.7 x 76.3 x 8.5 |
| బరువు | 183 గ్రాములు | 190 గ్రాములు |
| భద్రత | ఐపీ64 | ఐపీ53 |
వివో వీ40ఈ చూడటానికి దాదాపుగా ఇతర వీ40 సిరీస్ ఫోన్ల మాదిరే కనిపిస్తుంది. స్లిమ్ మరియు ప్రీమియమ్ డిజైన్ కలిగి ఉంది. మింట్ గ్రీన్ ఎడిషన్ బ్యాక్ ప్యానెల్ పై ప్యాటర్న్ ఫినిష్ ఉంది. మరోవైపు, రాయల్ బ్రాంజ్ వేరియంట్ ప్లెయిన్ ఫినిష్ తో వచ్చింది. నథింగ్ ఫోన్ 2ఏ ప్లస్ కంటే వివో వీ40ఈ ఎంతో కాంపాక్ట్గా మరియు తేలికగా ఉంటుంది.
మరోవైపు, నథింగ్ ఫోన్ 2ఏ ప్లస్, స్టాండర్డ్ ఫోన్ 2ఏ మాదిరే బ్యాక్ ప్యానెల్ పై గ్లైఫ్ లైటింగ్ తో కూడిన డిజైన్ తో వచ్చింది. ట్రాన్స్పరెంట్ రియర్ ప్యానెల్ తో వచ్చిన ఈ ఫోన్ లో కెమెరా మాడ్యూల్ పక్కన మూడు లైట్స్ ఉంటాయి. గ్రే ఎడిషన్ మెటాలిక్ ఫినిష్ కలిగి ఉంది. బ్లాక్ వేరియంట్ గ్లాసీ లుక్ తో ఉంది.
రెండు ఫోన్లలో, వివో వీ40ఈ ఐపీ64 రేటింగ్ తో వచ్చింది. ఇది దుమ్ము మరియు నీటి జల్లుల నుంచి రక్షణ అందిస్తుంది. మరోవైపు, నథింగ్ ఫోన్ 2ఏ ప్లస్ ఐపీ53 రేటింగ్ తో వచ్చింది. రెండు ఫోన్లు కూడా వర్షంలో ఉపయోగించేందుకు పనికిరావు.
Vivo V40e vs Nothing Phone (2a) Plus: డిస్ప్లే
| ఫోన్ | డిస్ప్లే |
| వివో వీ40ఈ | 6.78-ఇంచ్ ఫుల్హెచ్డీ+ అమోలెడ్, 120 హెర్ట్జ్ రిఫ్రెష్ రేట్, 388పీపీఐ, 1080×2392 రెజుల్యూషన్ |
| నథింగ్ ఫోన్ 2ఏ ప్లస్ | 6.7-ఇంచ్ ఫుల్హెచ్డీ+ అమోలెడ్, 120 హెర్ట్జ్ రిఫ్రెష్ రేట్, 395పీపీఐ, 1080×2412 రెజుల్యూషన్, గొరిల్లా గ్లాస్ 5 |
రెండు ఫోన్లలో ఒకే విధమైన డిస్ప్లే స్పెసిఫికేషన్స్ ఉన్నాయి. ఫుల్హెచ్డీ+ అమోలెడ్ ప్యానెల్, 120 హెర్ట్జ్ రిఫ్రెష్ రేట్ ఈ ఫోన్లలో ఉన్నాయి. అయితే, వివో వీ40ఈ లో కాస్త పెద్ద స్క్రీన్ ఉంది. నథింగ్ ఫోన్ 2ఏ ప్లస్ లో గొరిల్లా గ్లాస్ 5 ప్రొటెక్షన్ ఉంది.
Vivo V40e vs Nothing Phone (2a) Plus: పెర్ఫామెన్స్
| ఫోన్ | ప్రాసెసర్ |
| వివో వీ40ఈ | మీడియాటెక్ డైమెన్సిటీ 700 |
| నథింగ్ ఫోన్ 2ఏ ప్లస్ | మీడియాటెక్ డైమెన్సిటీ 7350 ప్రో |
నథింగ్ ఫోన్ 2ఏ ప్లస్ డివైజ్ మీడియాటెక్ డైమెన్సిటీ 7350 ప్రో చిప్సెట్ వాడారు. వివో వీ40ఈ లో డైమెన్సిటీ 7300 చిప్సెట్ వాడారు. డైమెన్సిటీ 7350 కాస్త శక్తివంతమైంది. ఫోన్ 2ఏ లో 12జిబి వరకు ర్యామ్ ఆప్షన్ అందిస్తుండగా, వివో వీ40ఈ లో కేవలం 8జిబి ర్యామ్ మాత్రమే అందిస్తున్నారు. ఈ సెగ్మెంట్ లో నథింగ్ ఫోన్ 2ఏ ప్లస్, వివో వీ40ఈ కంటే మెరుగ్గా ఉంది.
| ఫోన్ | అంటుటు | గీక్బెంచ్ సింగిల్-కోర్ | గీక్బెంచ్ మల్టీ-కోర్ |
| వివో వీ40ఈ | 6,70,195 | 962 | 2892 |
| నథింగ్ ఫోన్ 2ఏ ప్లస్ | 7,71,491 | 1,121 | 2,203 |
నథింగ్ ఫోన్ 2ఏ ప్లస్ అంటుటు టెస్ట్ లో 7,71,491 పాయింట్లు సాధించి, వివో వీ40ఈ (అంటుటు 6,70,195) పై విజయం సాధించింది. గీక్బెంచ్ లో కూడా ఇదే పరిస్థితి ఉంది. సింగిల్-కోర్ టెస్టులో ఫోన్ 2ఏ 1121 పాయింట్లు సాధించగా, వివో వీ40ఈ 962 పాయింట్లు సాధించింది. అయితే మల్టీ-కోర్ టెస్టులో మాత్రం వివో వీ40ఈ 2,892 పాయింట్లు నమోదు చేయగా, నథింగ్ ఫోన్ 2ఏ ప్లస్ 2,203 పాయింట్లు మాత్రమే సాధించింది.
Vivo V40e vs Nothing Phone (2a) Plus: కెమెరా
| ఫోన్ | రియర్ కెమెరా | ఫ్రంట్ కెమెరా |
| వివో వీ40ఈ | 50ఎంపి ఓఐఎస్ కెమెరా, 8ఎంపి అల్ట్రావైడ్ లెన్స్, 4కే/30ఎఫ్పీఎస్ | 50ఎంపి ఫ్రంట్ కెమెరా, 4కే రికార్డింగ్ |
| నథింగ్ ఫోన్ 2ఏ ప్లస్ | 50ఎంపి ఓఐఎస్ కెమెరా, 50ఎంపి అల్ట్రావైడ్ లెన్స్, 4కే/30ఎఫ్పీఎస్ | 50ఎంపి ఫ్రంట్ కెమెరా, 4కే రికార్డింగ్ |
కెమెరా విభాగంలో, నథింగ్ ఫోన్ 2ఏ ప్లస్, వివో వీ40ఈ పై కాస్త పైచేయి సాధించింది. రెండు ఫోన్లలో 50ఎంపి ఓఐఎస్ ప్రైమరీ కెమెరా ఉంది. అయితే ఫోన్ 2ఏ లో సెకండరీ కెమెరా వివో వీ40ఈ తో పోల్చితే బెటర్ గా ఉంది. నథింగ్ లో 50ఎంపి అల్ట్రావైడ్ లెన్స్ ఉండగా, వివో వీ40ఈ లో కేవలం 8ఎంపి అల్ట్రావైడ్ లెన్స్ ఉంది. ఇక రెండు ఫోన్లలో కూడా 50ఎంపి ఫ్రంట్ కెమెరా ఉంది.
ఇంకా మేం, వివో వీ40ఈ యొక్క కెమెరా క్వాలిటీని టెస్ట్ చేయలేదు. మీరు, నథింగ్ ఫోన్ 2ఏ యొక్క కెమెరా శాంపిల్స్ ను క్రింద గమనించవచ్చు.
Vivo V40e vs Nothing Phone (2a) Plus: బ్యాటరీ, చార్జింగ్
| ఫోన్ | బ్యాటరీ | చార్జింగ్ స్పీడ్ | పీసీమార్క్ బ్యాటరీ టెస్ట్ | 20%-100% చార్జింగ్ టైమ్ |
| వివో వీ40ఈ | 5000ఎంఏహెచ్ | 50 వాట్ | 15 గంటల 51 నిమిషాలు | 42 నిమిషాలు |
| నథింగ్ ఫోన్ 2ఏ ప్లస్ | 5000 ఎంఏహెచ్ | 50 వాట్ | 14 గంటల 34 నిమిషాలు | 51 నిమిషాలు |
రెండు ఫోన్లలో 5,000 ఎంఏహెచ్ బ్యాటరీ అందించారు. అయితే పీసీమార్క్ బ్యాటరీ టెస్టులో ఫలితాలు కాస్త వేరుగా ఉన్నాయి. వివో వీ40ఈ బ్యాటరీ 1 గంటా 13 నిమిషాలు ఎక్కువ సమయం నడిచింది. నథింద్ ఫోన్ 2ఏ ప్లస్ ఈ టెస్టులో కాస్త వెనుకబడింది.
రెండు ఫోన్లు కూడా 50 వాట్ ఫాస్ట్ చార్జింగ్ స్పీడ్ కి సపోర్ట్ చేస్తాయి. 20 శాతం నుంచి 100 శాతం చార్జ్ అయ్యేందుకు నథింగ్ ఫోన్ 2ఏ ప్లస్ కంటే 9 నిమిషాలు తక్కువ సమయం వివో వీ40ఈ తీసుకుంది.
Vivo V40e vs Nothing Phone (2a) Plus: సాఫ్ట్వేర్
| ఫోన్ | సాఫ్ట్వేర్ |
| వివో వీ40ఈ | ఆండ్రాయిడ్ 14, ఫన్టచ్ఓఎస్, 3+4 అప్డేట్ పాలసీ |
| నథింగ్ ఫోన్ 2ఏ ప్లస్ | ఆండ్రాయిడ్ 14, నథింగ్ఓఎస్, 3+4 అప్డేట్ పాలసీ |
వివో వీ40ఈ స్మార్ట్ఫోన్ ఆండ్రాయిడ్ 14ఓఎస్ ఆధారిత ఫన్టచ్ఓఎస్ కస్టమ్ స్కిన్ పై పని చేస్తుంది. నథింగ్ ఫోన్ 2ఏ ప్లస్ ఆండ్రాయిడ్ 14 ఓఎస్ ఆధారిత నథింగ్ఓఎస్ కస్టమ్ స్కిన్ పై పని చేస్తుంది. అయితే నథింగ్ లో బ్లోట్ వేర్ ఉండదు. కానీ, వివో వీ40ఈ లో ప్రీ-ఇన్స్టాల్డ్ థర్డ్ పార్టీ యాప్స్ ఉంటాయి. అయితే వీటిని మీరు తీసివేయచ్చు. రెండు సంస్థలు కూడా, 3 ఏళ్ళు ఓఎస్, నాలుగేళ్ళు సెక్యూరిటీ అప్డేట్స్ ప్రామిస్ చేస్తున్నాయి.
ఏది బెటర్?
Vivo V40e కంటే Nothing Phone (2a) Plus బెటర్ ఆప్షన్ అని చెప్పవచ్చు. శక్తివంతమైన చిప్సెట్, బెటర్ కెమెరా సెటప్, డిస్ప్లే ప్రొటెక్షన్, క్లీన్ సాఫ్ట్వేర్ వంటివి నథింగ్ లో ఉన్నాయి. అంతేకాదు, వివో వీ40ఈ కంటే తక్కువ ధరలో నథింగ్ ఫోన్ 2ఏ ప్లస్ లభిస్తోంది.
అయితే, వివో వీ40ఈ లో బెటర్ ఐపీ రేటింగ్, మంచి బ్యాటరీ బ్యాకప్, ఫాస్ట్ చార్జింగ్ స్పీడ్ వంటి ప్లస్ పాయింట్లు ఉన్నాయి. మీకు బ్యాటరీ లైఫ్ మరియు ఫాస్ట్ చార్జింగ్ కావాలంటే కొంత డబ్బు ఎక్కువ చెల్లించి వివో వీ40ఈ తీసుకోండి. లేదంటే నథింగ్ ఫోన్ 2ఏ ప్లస్ ను ఎంచుకోండి.