स्मार्टफोन विश्वातील Apple ब्रँडच्या iPhones चं वेड जगप्रसिद्ध आहे. आयफोन आणि किडनीची 2011 मधील गोष्ट अजूनही मिम्समध्ये जिवंत आहे. आयफोनसाठी लोक काहीही करू शकतात हे पुन्हा एकदा एका गोष्टीतून सिद्ध झालं आहे. नवीन आयफोन मिळवण्यासाठी अ‍ॅप्पल फॅन कोणत्याही मर्यादा ओलांडू शकतात आणि महागडा फोन विकत घेण्यासाठी पाण्यासारखे पैसे खर्च करताना देखील मागे पुढे पाहत नाहीत. असंच एक उदाहरण समोर आलं आहे ज्यात नवीन iPhone 14 Pro सर्वप्रथम मिळवण्यासाठी केरळचा एक व्यक्ती विमानप्रवास करून दुबईला पोहोचला.
iPhone 14 Pro च्या खरेदीसाठी गाठली दुबई!
Apple iPhone 14 Series ची विक्री भारतात 16 सप्टेंबरपासून सुरु झाली आहे. सीरीजमध्ये iPhone 14, iPhone 14 Pro आणि iPhone 14 Pro Max लाँच झाले आहेत तसेच नवीन आयफोन्ससाठी लोक वेडे झाले आहेत. आयफोनचं वेड इतकं आहे होतं की एक व्यक्ती देशातील पहिला आयफोन 14 प्रो युजर बनण्यासाठी फ्लाइट पकडून दुबईला पोहोचला. हे देखील वाचा: अमेरिकन आयफोनला मिळणार स्वदेशी ‘टच’; लवकरच TATA कंपनी बनवू शकते iPhone
केरळमधील या व्यक्तीचे नाव धीरज पल्लियिल आहे जो कोची मधला व्यावसायिक आहे. त्याला भारतात सर्वप्रथम आयफोन 14 प्रो मिळवायचा होता. यासाठी 16 सप्टेंबरला भारतात सेल सुरु होण्याच्या एक दिवस आधी या व्यक्तीनं फ्लाइट पकडून थेट दुबई गाठली आणि तिथून त्याने आपला नवीन iPhone 14 Pro विकत घेतला. अशाप्रकारे तो आयफोन 14 प्रो विकत घेणारा सर्वात पहिला भारतीय बनला.
iPhone 14 Price in Dubai
भारतातील सर्वात पहिला iPhone 14 Pro तर मिळाला पण त्यासाठी तेवढा खर्च देखील धीरजला करावा लागला. न्यूज रिपोर्टनुसार आयफोन 14 प्रोसाठी त्याने केरळवरून दुबई पर्यंतच्या फ्लाइट टिकट बुकिंग आणि वीजावर 40,000 रुपये खर्च केले होते. तसेच दुबईला जाऊन मिर्डिफ सिटी सेंटरमधून iPhone 14 Pro 512GB Storage व्हेरिएंट खरेदी करण्यासाठी 1,29,000 रुपये मोजले.
विमानप्रवास आणि आयफोनची किंमत मिळून त्याला हा आयफोन जवळपास 1,69,000 रुपयांना पडला आहे. भारतात आयफोन 14 प्रोच्या 512 जीबी व्हेरियंटची किंमत 1,59,900 रुपये आहे.धीरजनं या आयफोनचा नवीन पर्पल कलर व्हेरिएंट खरेदी केला आहे. हे देखील वाचा: iPhone 14 Series India Price: जुन्याच किंमतीत आला नवीन आयफोन 14, जाणून घ्या आयफोन 14 प्रो मॅक्स पर्यंतच्या सर्व मॉडेल्सची किंमत
iPhone in Dubai
विशेष म्हणजे दुबईत जाऊन आयफोन विकत घेण्याची पल्लियिलची ही पहिली वेळ नाही. याआधी देखील धीरजनं 3 वेळा दुबईला जाऊन नवीन आयफोन विकत घेतला आहे. iPhone 11 Pro Max, iPhone 12 आणि iPhone 13 देखील या व्यक्तीने भारतात विक्री सुरु होण्याच्या एक दिवस आधी दुबईत जाऊन विकत घेतले होते. धीरजनं टीओआयला सांगितलं आहे की फक्त भारतातच नव्हे तर दुबईत देखील तो आयफोन 12 आणि आयफोन 13 खरेदी करणारा पहिला ग्राहक बनला होता.
